किल्ले धारूर: आमदार सोळंके यांच्या उपस्थितीत विविध समस्यांवर लक्ष वेधले; तातडीने उपाययोजनांची मागणी
किल्ले धारूर: आमदार सोळंके यांच्या उपस्थितीत विविध समस्यांवर लक्ष वेधले; तातडीने उपाययोजनांची मागणी
सुर्यकांत जगताप ( पत्रकार )
किल्ले धारूर, दि. १ जून २०२५: आज दुपारी १२.०० वाजता किल्ले धारूर बसस्थानक येथे नवीन बसगाडीच्या उद्घाटन प्रसंगी उपस्थित असलेले माजलगाव मतदारसंघाचे आमदार श्री. प्रकाशदादा सोळंके यांचे किल्ले धारूर यूथ क्लब सामाजिक संस्थेच्या वतीने मनःपूर्वक स्वागत करण्यात आले. यावेळी संस्थेच्या वतीने किल्ले धारूर शहरातील विविध महत्त्वपूर्ण आणि ज्वलंत समस्यांबाबत त्यांना निवेदन देऊन तातडीने उपाययोजना करण्याची मागणी करण्यात आली.
आमदार प्रकाशदादा सोळंके यांच्या नेतृत्वाखाली माजलगाव मतदारसंघाचा विकास होत असल्याबद्दल किल्ले धारूरकरांनी समाधान व्यक्त केले.
याच अनुषंगाने, किल्ले धारूर शहराच्या सर्वांगीण विकासासाठी आणि येथील नागरिकांचे जीवनमान अधिक सुखकर करण्यासाठी काही मूलभूत समस्यांकडे त्यांचे लक्ष वेधण्यात आले. किल्ले धारूर हे ऐतिहासिक आणि सांस्कृतिकदृष्ट्या महत्त्वाचे शहर असून, येथील नागरिक अनेक समस्यांशी झुंज देत असल्याचे निवेदनात नमूद करण्यात आले आहे.
किल्लेदार यूथ क्लब सामाजिक संस्थेने आमदारांसमोर मांडलेल्या प्रमुख मागण्या खालीलप्रमाणे आहेत:
१. ग्रामीण रुग्णालयाकडे जाणारा रस्ता दुरुस्ती: परिसरातील शेकडो गावांना आरोग्य सेवा पुरवणाऱ्या ग्रामीण रुग्णालयाकडे जाणारा रस्ता क्रमांक एकची दयनीय अवस्था झाली आहे. रुग्णांना आणि त्यांच्या नातेवाईकांना होणारा त्रास लक्षात घेता, या रस्त्याचे प्राधान्याने नूतनीकरण करण्याची मागणी करण्यात आली.
२. नवीन बसस्थानकाचे तातडीने उद्घाटन: नवीन बसस्थानकाचे काम पूर्ण होऊनही अद्याप त्याचे पूर्ण क्षमतेने उद्घाटन झालेले नाही. वाहतूक व्यवस्थेचे केंद्र बनणाऱ्या या बसस्थानकाचे तातडीने उद्घाटन करून प्रवाशांना चांगल्या सुविधा उपलब्ध करून देण्याची मागणी करण्यात आली.
३. महावितरणची कार्यक्षमता वाढवावी: किल्ले धारूर शहरात आणि परिसरात वारंवार खंडित होणाऱ्या वीजपुरवठ्यामुळे विद्यार्थी, व्यावसायिक आणि सामान्य नागरिक त्रस्त आहेत. अखंडित आणि दर्जेदार वीजपुरवठा सुरळीत करण्याची मागणी करण्यात आली.
४. घाटाचे रुंदीकरण: किल्ले धारूर येथील घाटाची रुंदी कमी असल्याने वाहतूक कोंडी आणि अपघातांचे प्रमाण वाढले आहे. वाहतूक कोंडी टाळण्यासाठी आणि प्रवासाची सुरक्षितता सुनिश्चित करण्यासाठी घाटाचे तातडीने रुंदीकरण करणे आवश्यक असल्याचे निवेदनात म्हटले आहे.
५. पशुवैद्यकीय दवाखान्याचे उद्घाटन: किल्ले धारूर आणि आसपासच्या ग्रामीण भागातील शेतकऱ्यांच्या पशुधनासाठी महत्त्वाच्या असलेल्या पशुवैद्यकीय दवाखान्याचे काम पूर्ण होऊनही अद्याप त्याचे उद्घाटन झालेले नाही. पशुधनाच्या आरोग्यासाठी ही सेवा तात्काळ सुरू होण्याची मागणी करण्यात आली.
६. पोस्ट ऑफिसच्या नवीन शासकीय इमारतीचे उद्घाटन: किल्ले धारूर पोस्ट ऑफिसची नवीन शासकीय इमारत तयार असूनही ती अद्याप कार्यान्वित झालेली नाही. नागरिकांना चांगल्या सुविधा देण्यासाठी या इमारतीचे तातडीने उद्घाटन करून ती लोकांच्या सेवेत रुजू करावी अशी मागणी करण्यात आली.
७. वन थर्टी सिक्स मिलिटरी बटालियनला गायरान जमीन: दरवर्षी २०० हेक्टर गायरान जमीन वन थर्टी सिक्स मिलिटरी बटालियनला उपलब्ध करून देण्याची मागणीही यावेळी करण्यात आली.
८. इतर समस्या: याव्यतिरिक्त, पिण्याच्या पाण्याची समस्या, अंतर्गत रस्त्यांची दुर्दशा, वाढती बेरोजगारी, क्रीडांगणांचा अभाव यासारख्या अनेक समस्यांवरही आमदारांनी लक्ष द्यावे अशी अपेक्षा व्यक्त करण्यात आली.
किल्ले धारूर यूथ क्लब सामाजिक संस्थेचे अध्यक्ष दत्ता गोरे यांनी सांगितले की, या समस्यांची सोडवणूक झाल्यास किल्ले धारूर शहराचा खऱ्या अर्थाने विकास साधला जाईल आणि येथील नागरिकांना दिलासा मिळेल. किल्ले धारूरकरांच्या वतीने या गंभीर समस्यांची गांभीर्याने दखल घेऊन, तातडीने आवश्यक त्या उपाययोजना कराव्यात अशी नम्र विनंती आमदारांना करण्यात आली.
यावेळी ज्येष्ठ पत्रकार अनिलजी महाजन, माजी अध्यक्ष सूर्यकांत जगताप, पत्रकार नाथाभाऊ ढगे, मीडिया संघटनेचे अध्यक्ष खिंडरे, कार्याध्यक्ष पोतदार, किल्ले धारूर यूथ क्लबचे सदस्य, माजी स्वातंत्र्यसैनिक संघटनेचे अध्यक्ष दत्ता शिनगारे मेजर व त्यांचे सहकारी तसेच शहरातील मोठ्या संख्येने नागरिक उपस्थित होते.
Comments
Post a Comment