किल्ले धारूर नगरपरिषद: प्रभाग रचनेचे काम ११ ते १६ जून दरम्यान
किल्ले धारूर नगरपरिषद: प्रभाग रचनेचे काम ११ ते १६ जून दरम्यान
सुर्यकांत जगताप ( पत्रकार )
किल्ले धारूर: महाराष्ट्र शासनाच्या नगर विकास विभागाने राज्यातील महानगरपालिका, नगरपरिषदा आणि नगरपंचायतींच्या सार्वत्रिक निवडणुकांसंदर्भात एक महत्त्वाचा आदेश मुंबईतून १२ जून २०२५ रोजी जारी केला आहे. या आदेशानुसार, आगामी निवडणुका प्रभाग रचना करूनच घेण्यात येणार आहेत. या पार्श्वभूमीवर धारूर नगरपरिषदेसाठी प्रभाग रचनेचे सविस्तर वेळापत्रक जाहीर करण्यात आले आहे.
आदेशात नमूद केल्यानुसार, प्रभाग रचनेसाठी आवश्यक असलेल्या 'प्रगणक गटाची मांडणी करणे' या टप्प्यातील कार्यवाही संबंधित मुख्याधिकारी यांच्याकडून केली जाईल. किल्ले धारूर नगरपरिषदेसाठी ही कार्यवाही ११ जून २०२५ ते १६ जून २०२५ या कालावधीत पूर्ण करावी लागणार आहे. या संदर्भात यापूर्वीच ०१ जून २०२५ रोजी आदेश निर्गमित करण्यात आले होते, ज्याचा संदर्भ या नवीन आदेशात देण्यात आला आहे.
नागरिक स्थानिक स्वराज्य संस्थांच्या निवडणुका विहित कालावधीत घेण्याचे सर्वोच्च न्यायालयाचे स्पष्ट आदेश असल्याने, या प्रभाग रचनेच्या वेळापत्रकात कोणतीही सवलत किंवा बदल अनुज्ञेय नसणार असल्याचे नगर विकास विभागाने ठामपणे सांगितले आहे. यामुळे, प्रभाग रचनेच्या कामाला गती येणार असून, धारूर नगरपरिषदेतील संबंधित अधिकाऱ्यांनी निर्धारित वेळेत ही कार्यवाही पूर्ण करण्याची दक्षता घ्यावी, असे निर्देश देण्यात आले आहेत. यामुळे किल्ले धारूर नगरपरिषदेच्या आगामी निवडणुका प्रभाग रचनेच्या कामावर अवलंबून असणार आहेत.
Comments
Post a Comment